Welcome

Rydym hefyd yn ddatblygwr tai newydd mawr gyda dros 600 ar waith ar hyn o bryd. Rydym yn ymfalchïo mewn adeiladu cartrefi o safon uchel; pob un yn cael ei adeiladu i gyrraedd EPC A o leiaf; gan eu gwneud yn fforddiadwy i’n tenantiaid i fyw ynddynt a helpu i leihau allyriadau carbon. Rydym wedi adeiladu nifer o gynlluniau tai blaengar sy’n defnyddio adeiladwyr lleol o Gymru; fframiau pren wedi eu hadeiladu yng ngharchar y Berwyn a’r pympiau ffynhonnell aer a thechnoleg batri diweddaraf ac ati. Mae 80% o’n rhaglen yn dai cymdeithasol, ond rydym hefyd wedi adeiladu cartrefi ar gyfer rhent canolradd a phrynu gyda chymorth.

Rydym yn berchen ar 6,300 o gartrefi o oedrannau a mathau amrywiol ac rydym wedi ymrwymo i raglen eang o ôl-osod dros y 10 mlynedd nesaf.

Mae datblygu llais cryf i breswylwyr yn bwysig ac mae ein strwythur llywodraethu wedi ei adnewyddu yn sicr yn cefnogi hyn. Mae preswylwyr yn ganolog i bob penderfyniad a wnawn ac yn dylanwadu ar yr hyn yr ydym yn ei wneud a sut yr ydym yn ei wneud. Rydym yn croesawu adborth hyd yn oed pan fydd yn anghyfforddus ac rydym am wneud popeth allwn ni i fodloni disgwyliadau preswylwyr.

Rydym yn credu’n gryf ym manteision cydweithio a gweithio mewn partneriaeth. Rydym wedi datblygu perthynas gadarnhaol ar lefel leol, ranbarthol a chenedlaethol, y bydd Aelodau’r Bwrdd newydd am eu cefnogi a’u hannog.

 Mae gennym gyfradd gredyd gref a digon o fenthyciadau ar gyfraddau llogau sefydlog i ariannu ein rhaglen ddatblygu am yr ychydig flynyddoedd nesaf. Rydym wedi cael y dyfarniad rheoleiddiol uchaf gan Lywodraeth Cymru ar gyfer cyllid a darparu gwasanaeth, ac nid oes gennym unrhyw weithredoedd gwella ffurfiol o ymweliadau rheoleiddiol diweddar Arolygaeth Gofal Cymru.

Mae ein blaenoriaethau ar gyfer yr ychydig flynyddoedd nesaf yn cynnwys; ailadeiladu ein helw ar weithrediadau ar ôl covid; datblygu cynllun fforddiadwy y gellir ei gyflawni i leihau ein hallyriadau carbon; sicrhau bod ein holl breswylwyr yn byw mewn cartrefi diogel, o safon uchel y gallant fforddio eu cynhesu; bodloni gofynion y drefn Diogelwch Adeiladau a buddsoddi rhagor i ymdrin ag effeithiau ac achosion tlodi yn ein cymunedau.

Rydym am fod yn enghraifft o arfer da o ran cynhwysiant ac amrywiaeth fel cyflogwr a darparwr gwasanaeth. Rydym ymhlith y 30 cyflogwr uchaf ar draws y Deyrnas Unedig i deuluoedd sy’n gweithio ac yn cynnig lle cyffrous a hwyliog i’n staff weithio gyda phecyn da o fuddion a hyblygrwydd i reoli eu gwaith a’u bywydau personol hefyd. Mae lefelau bodlonrwydd ein staff yn uchel, ac rydym wedi cyfnewid nifer o bolisïau â chyfarwyddyd gan adael i’n Rheolwyr weithredu mewn ffordd hyblyg sy’n canolbwyntio ar yr unigolyn; gan fodloni anghenion busnes o ran ansawdd y gwasanaeth a pherfformiad.

 Mae gennym Fwrdd cryf a thalentog, ac mae’r holl Aelodau yn cynnig gwahanol sgiliau a phrofiadau. Cefnogir y Bwrdd gan bedwar Pwyllgor a Thîm Gweithredol profiadol llawn ysgogiad, a staff ymroddedig, brwdfrydig a thalentog. Mae’r wybodaeth isod yn rhoi darlun manylach i chi o’r Grŵp. Byddem yn disgwyl i Aelodau newydd y Bwrdd hefyd fod yn aelod o 1 Pwyllgor o leiaf.

Rydym mewn lleoliad canolog ar hyd coridor Gogledd Cymru, 35 munud o Fangor a Wrecsam ac awr o Fanceinion. Yn ystod y blynyddoedd diwethaf, rydym wedi datblygu ein dull o hyrwyddo gweithio ystwyth yn sylweddol ac rydym yn disgwyl parhau â dull cymysg o gyfarfodydd yn y dyfodol. Rydym yn gwmni balch iawn o Gymru a byddem yn croesawu ceisiadau gan siaradwyr Cymraeg, ac aelodau o gymunedau lleiafrifol ac amrywiol.

Rwyf yn ildio fy lle ar ddiwedd Medi yn ein Cyfarfod Cyffredinol Blynyddol, ar ôl gwasanaethu am bron i naw mlynedd gyda llawer o lwyddiannau i ymfalchïo ynddynt; ac wedi llwyddo i benodi’r Cadeirydd nesaf mae’n amser cyffrous i ClwydAlyn.

Os ydych yn angerddol am ein cenhadaeth a’n gwerthoedd, yna rydym yn edrych ymlaen yn fawr at gael clywed gennych.

Cofion cynnes

Stephen Porter
Cris McGuiness

Cadeirydd ClwydAlyn
Cadeirydd Newydd ClwydAlyn